話咁快就踏入12月啦，年尾多假期，又無咁熱，非常適合出去玩！但來來去去都行街睇燈飾，會唔會悶左少少呢？今日我哋就推薦大家去啲平時大家比較少做但其實好有意義既活動，無論你自己去，抑或同親朋好友一齊去都可以！一齊充實咁過個唔一樣嘅年尾，準備迎接新嘅一年啦！
1. DIY (Do-It-Yourself)
顧名思義就係自己親手造啲嘢出嚟，臨近聖誕，見到啲聖誕樹呀燈飾呀全部好靚，其實唔使一定出去行街同人逼！如果想有啲新意，可以嘗試用環保物料，以低成本親手整棵聖誕樹擺喺屋企做裝飾，更添聖誕氣氛之餘，仲有多份親手造嘅滿足感添！
DIY聖誕樹點子：
https://blog.pinkoi.com/tw/lifestyle/1r0p5hqe/
2. 文化活動：
無論係音樂會、讀書會、舞台劇，或者去睇藝術展，呢啲文化活動除咗可以陶冶性情之餘，仲可以令人反思生活同生命，絕對係非常適合作為年尾嘅活動。
今年12月有《幽泉亂石流》展覽，可以欣賞本地畫家翟宗浩以現代風格注入傳統中國書畫。
展覽資訊：
https://www.hkfringeclub.com/zh/whatson/2005-%E5%B9%BD%E6%B3%89%E4%BA%82%E7%9F%B3%E6%B5%81.html
3. 冬日市集：
踏入冬天，坊間有唔少聖誕市集展示獨特嘅手作精品，又會有表演睇，仲會有好多唔同嘅小食。有時唔行繁忙嘅商店街，喺市集漫步，觀察吓人與人之間嘅互動同笑臉，感受吓節日嘅喜悅同溫暖，尋找吓城市入面獨一無二嘅寶藏，都係一個唔錯嘅選擇。
今年赤柱廣場久違哋舉辦「Chillmas by the Sea」市集，仲用左好特別嘅澳洲聖誕為主題，等你喺香港都可以感受下南半球嘅仲夏聖誕氣氛！
市集詳情：
https://www.linkreit.com/tc/media/news-releases/stanley-plaza-presents-chillmas-by-the-sea/
4. 豪華露營 (Glamping)：
年尾倒數，除左喺海傍同人逼，大家可以選擇逃離城市嘅喧囂，投入大自然嘅懷抱，來一個豪華露營。豪華露營即係露營場地已提供一切所需設施同服務，唔使自己搭帳篷、準備食物，基本上帶幾件衫就住得。唔好以為叫豪華露營就一定好貴，其實不少營地收費都合理。香港有不少Glamping營地選擇，例如特色露營帳篷、露營車等等，讓大家沉浸喺山林之間，呼吸清新嘅空氣，擁抱寧靜的年末時刻。
露營場地預約網站：
5. 義工：
年末除咗關注自己，都可以係一個關懷他人嘅時刻。參與義工服務活動，為弱勢社群帶嚟溫暖同關愛。通常年尾會比較多義工活動，例如捐贈、探訪獨居老人同孤兒院去送暖，大家可以用自己嘅力量為社會作出貢獻，同時也為自己的心靈帶來滿足與喜悅。
大家有興趣可以上呢個網站睇下有咩義工活動可以參與！
https://app.socialcareer.org/volunteers
希望大家今年可以搵到啲有新意又有意義嘅歲末活動參與，為2023年畫上一個圓滿句號。
如果你都有啲年尾活動推介，歡迎你留言分享吓！
